கற்பூர நாயகியே கனகவல்லியும் யுவன் ஷங்கர் ராஜாவும்

என்னவாயிற்று யுவன் ஷங்கர் ராஜாவுக்கு. வருடத்திற்கு ஒரு முறை ஏதாவது ஒரு பாடலை காப்பி அடிக்க வேண்டும் என்று வரைமுறை வைத்திருக்கிறாரா என்று தெரியவில்லை. தாஸ் படத்தில் இளையராஜாவின் நீங்கள் கேட்டவை படத்தின் அடியே மனம் நில்லுன்னா நிக்காதடி என்ற பாடலை, வா..வா..நீ வராங்காட்டி போ போ என்று மாற்றி போட்டவர், இரண்டு நாட்களுக்கு முன், வெளியான ஹரி இயக்கி, விஷால் நடிக்கும் தாமிரபரணி படத்தில் மற்றொரு தவறைச் செய்திருக்கிறார்.

சிறியவர் முதல் பெரியவர் வரை எல்லோரும் ஒரு முறையாவது கேட்டிருப்பர் எல்.ஆர்.ஈஸ்வரி பாடிய கற்பூர நாயகியே கனகவல்லி என்னும் பாடலை. அந்தப் பாடலை அப்படியே மேற்கத்திய இசை வாத்தியங்களுடன் கருப்பான கையாலே என்னை பிடிச்சான் என்று இசைத்திருக்கிறார். இதை கண்டுபிடிக்க யாருக்கும் எந்த இசைஞானமும் தேவை இருக்காது. எல்லா இசையமைப்பாளர்களும் சொல்லும், இயக்குநர் கேட்டதால் அப்படி இசைத்தேன் என்னும் அதே பல்லவியை தான் இவரும் சொல்லப்போகிறார.. என்ன காரணம் யுவன் சொன்னாலும் நல்ல இசைகளினால் மெல்ல உயரிய ஏணியில் ஏறிக் கொண்டிருக்கும் இவருக்கு இது நிச்சயம் சறுக்கலே.

(ஆனால் இந்தப் பாட்டிற்கு முன், கற்பூர நாயகியே பாட்டை கேட்டுவிட்டு நாயகி இந்த டூயட்டை கனவு காண்பது போல் டைரக்டர் ஹரி படமாக்கி இருந்தால் நான் பொறுப்பல்ல)